SEMANA ESPECIAL DO LIBRO
A libraría LIBROS PARA SOÑAR (Triunfo, 1) de Vigo organiza este martes, co gallo do Día do Libro, unha sesión de contacontos co lema “Bechos, bechiños e outros contiños”. A actividade, dirixida a nenas e nenos a partir de tres anos, enmárcase na programación da Semana especial do libro, que se completará o venres 26 cun obradoiro de collage dirixido polo ilustrador Marc Taeger.
A sesión de contacontos do 23 de abril comezará ás 18:00 horas e contará coa participación das catro libreiras de LIBROS PARA SOÑAR: Belén, Carmela, Sandra e Zeltia. No repertorio non faltarán personaxes clásicos e actuais da Literatura Infantil e Xuvenil entre a abundante fauna que protagoniza as historias das que se nutre a infancia: contos tradicionais, obras de autores emblemáticos que, como Eric Carle, Leo Lionni, Tomi Ungerer ou Shel Silverstein, lles dedicaron parte da súa bibliografía, e autoras e autores contemporáneos que modernizaron o xénero da fábula.
Ademais, como é tradicional nesta data conmemorativa, LIBROS PARA SOÑAR aplicará un 10 por cento de desconto en todas as compras.
OBRADOIRO DE COLLAGE
A Semana especial do libro tamén inclúe o taller “Collage de animais” co ilustrador suízo -afincado no Morrazo- Marc Taeger, o venres 26 a partir das 18:30 horas. As nenas e os nenos poderán crear criaturas de todo tipo -domésticas e salvaxes; acuáticas, voadoras ou terrestres; autóctonas ou exóticas…- feitos con pezas de papel de distintas formas, cores e texturas.
Marc Taeger estudou deseño gráfico e ilustración en Barcelona e na FH de Trier (Alemaña). Traballa como ilustrador e deseñador, especializado en animación, pintura, mural, escultura e arte gráfica. Expuxo a súa obra en Luxemburgo, Alemaña, China, España, Francia e Costa Rica. Recibiu o Premio Daniel Gil 2005 polas ilustracións e o deseño de «A verdadeira historia de Carapuchiña», publicado por KALANDRAKA. Nesta mesma editorial seguíronlle os álbums «Aquiles o puntiño», «Elefante comellón», «Garavanciño», «Artur», «Un máis», «O elefante que perdeu o seu ollo», o poemario «Ciudades» e os libro-discos «Extra!» e «Tic-tac», aos que se acaba de sumar «Son animal». A celebración deste taller enmárcase nun programa de promoción da lectura que conta co apoio do Ministerio de Cultura e Deportes a través do Plan de Fomento da Lectura 2021-2024.
O músico Paco Nogueiras recolle a banda sonora do noso medio rural no seu novo libro-disco, «Son animal», ilustrado por Marc Taeger e publicado por KALANDRAKA. Ambos os autores participarán nun concerto de presentación, mañá venres, a partir das 18:30 horas, na libraría LIBROS PARA SOÑAR (Triunfo, 1) de Vigo. Tras «Brinca vai!», «Radio bulebule» e «Extra!», as doce cancións deste cuarto traballo musical teñen como protagonistas a animais domésticos como o can, o gato, a vaca, a galiña, o porco, o burro… e outros silvestres como a ra ou o grilo.
Trátase de composicións que tanto describen as calidades físicas dos animais como os seus costumes e habilidades; ben de xeito poético, ben cun enfoque divertido e humorístico. Paco Nogueiras trae ao presente as súas lembranzas da nenez en contacto con estes habitantes do agro, en contraposición co descoñecemento que moitas nenas e nenos teñen actualmente desta fauna tan próxima pola desconexión das vilas e das cidades co campo, cada vez máis despoboado.
Co título deste libro-disco o compositor galego tamén fai un xogo de palabras: dunha banda, apela á condición animal do ser humano en relación á biodiversidade do planeta; por outro lado, dialoga con estas criaturas a través da linguaxe -ladrando, miañando, orneando, bruando, cacarexando…- coa que se comunican.
E consonte coa riqueza sinfónica destas voces, son tamén moi variados os estilos: dende pezas con raigame tradicional galega e portuguesa, aos ritmos electrónicos, a balada acústica, o rock&roll ou o rap, pasando polos ecos do leste de Europa ou de terras andinas; unha viaxe musical polo mundo que invita a bailar e a cantar con retrousos alegres e pegadizos.
O ilustrador Marc Taeger -de orixe suíza, mais afincado no Morrazo- desenvolve unha proposta gráfica a base de trazos grosos, fondos coloridos e luminosos que acentúan os riscos característicos dos animais, reforzando o sentido do humor e o afecto que producen os intérpretes desta singular orquestra. «Son animal» complétase cun anexo que recolle algúns dos abundantes ditos, refráns e adiviñas de temática zoolóxica que atesoura a tradición oral do país.
NÚRIA FIGUERAS E ANNA FONT PRESENTAN “A VISITA”
LIBROS PARA SOÑAR recibe este venres as autoras de «A visita», Núria Figueras e Anna Font. Trátase da obra distinguida co XVI Premio Internacional Compostela de Álbum Ilustrado, un certame organizado polo Departamento de Educación do Concello de Santiago e KALANDRAKA. Núria Figueras e Anna Font completan a súa estadía en Galicia acudindo á libraría infantil e xuvenil do Casco Vello vigués onde, a partir das 18:00 horas, participarán nunha sesión de contacontos para presentar o seu libro e asinar exemplares.
«A visita» conta que unha pequena raposiña ignora as indicacións da súa nai que lle advirte de non deixar entrar a ninguén na cova e deixa pasar o Silencio. Tralo temor a unha presenza que inicialmente a intimida, resulta ser un hóspede moi especial que lle aprende a bailar ao compás do seu corazón e a escoitar os seus pensamentos.
As autoras van debullar as distintas lecturas que ofrece «A visita», como o papel positivo do Silencio para axudarnos a reflexionar, practicar a introspección, coñecernos e saber que sentimos. Dende o punto de vista literario a obra destaca por tomar pinceladas dos contos clásicos, establecer un diálogo áxil e tenro entre os personaxes e manexar recursos estilísticos que dan como resultado un relato delicioso, orixinal e necesario.
Aínda que a historia transcorre en plena noite, as páxinas de «A visita» son luminosas e coloridas: dende un bosque de vexetación esquemática, cun cromatismo exuberante e repleto de matices, adentrámonos nun cálido tobo onde destaca a simpática figura da raposa e os trazos sinxelos cos que se representa algo tan intanxible e invisible como o Silencio.
Para esta actividade especial, dirixida a nenas e nenos a partir de tres anos, LIBROS PARA SOÑAR loce no seu escaparate unha instalación artística realizada por Tete Núñez ‘Pecas-pita’ a partir dos personaxes de «A visita».
‘AFINIDADES ELECTIVAS’ ENTRE CARME SOLÉ E XOSÉ COBAS
A ilustradora catalana Carme Solé Vendrell e o ilustrador galego Xosé Cobas protagonizaron unha memorable sesión do ciclo Afinidades Electivas -impulsado pola Dirección Xeral do Libro e Fomento da Lectura- na libraría Libros para Soñar, co lema “Dous mares, a luz de dúas olladas”.
A influencia do mar e do clima nas súas respectivas obras foi un dos aspectos que abordaron nun coloquio no que repasaron as súas bibliografías, con recordos e anécdotas cheas de humor.
Tamén a infancia marcou a traxectoria de ambos os dous artistas.
“As nenas e os nenos son o mellor que hai. Os dereitos da infancia non só son a alimentación e a educación; cos teléfonos móbiles estáselles privando da imaxinación. Por iso quen ilustramos e traballamos coa infancia temos unha responsabilidade”, afirmou Carme Solé, que falou da pegada que lle deixou a perda da súa nai na nenez, a súa paixón polo teatro -de onde procede a súa educación plástica- e o seu compromiso cos dereitos das nenas e dos nenos a través da campaña internacional Why? “Cando pinto a súa dor, tamén é a miña”, engadiu a autora, que entende “a vida como un servizo á sociedade”.
“A miña infancia foi fundamental para ser ilustrador”, coincidiu Xosé Cobas. “Eu comecei a ler alfabeticamente ao tempo que graficamente, nas latas da taberna do meu avó e nos anuncios dos xornais; foi unha escola de imaxe, de cultura visual”, lembrou sobre a influencia desa bagaxe na súa carreira, primeiro como pintor e posteriormente como ilustrador de literatura infantil e xuvenil da man do escritor Xabier P. Docampo: “Canto máis ilustraba, máis me gustaba, ata que o pintor foi quedando en nada”, precisou Cobas, por máis que nos seus libros sempre hai referencias á pintura, á escultura e á arquitectura.
O seu próximo traballo, que chegará ás librarías en novembro, é a edición ilustrada en galego da novela “Azucre”, de Bibiana Candia, na colección Kalandraka +.
CARME SOLÉ E XOSÉ COBAS, DOUS GRANDES ARTISTAS EN VIGO
A ilustradora Carme Solé Vendrell e o ilustrador Xosé Cobas participarán o vindeiro martes, 18 de outubro, no encontro artístico e literario organizado pola libraría Libros para soñar (Triunfo, 1) de Vigo, no marco do ciclo Afinidades Electivas impulsado pola Dirección Xeral do Libro e Fomento da Lectura. A sesión, co lema «Dous mares, a luz de dúas olladas», comezará ás 18:30 horas e está dirixida a público adulto. Ambos os artistas manterán un coloquio no que repasarán as súas respectivas traxectorias e compartirán impresións sobre o panorama da ilustración actual e a súa evolución.
Distinguida coa Medalla de Ouro ao Mérito nas Belas Artes 2021, co Premio Nacional de Ilustración 2013 polo conxunto da súa obra, co Premio Nacional de Cultura 2012 e candidata ao Premio Memorial Astrid Lindgren 2010, entre outros recoñecementos, Carme Solé editou o seu primeiro título en 1968 e suma máis de 700 obras ilustradas, entre álbums e libros de texto publicados en numerosos países. Os seus traballos que, ademais do eido editorial tamén abranguen a escenografía, a dramaturxia, o cartelismo e a animación, protagonizaron varias exposicións antolóxicas. Dende a década dos 90 compaxina a ilustración e a pintura e, nos últimos anos, é promotora da campaña «Why?» sobre os dereitos da infancia. É autora de clásicos como «A lúa de Xoán» e «Cepillo», aos que vén de incorporarse «Fab, o monstro amarelo», recuperados por KALANDRAKA.
A súa ollada mediterránea complementarase coa mirada atlántica de Xosé Cobas. Dende os seus inicios na pintura a finais dos 70, pasando pola escultura, a ilustración en prensa e o deseño gráfico, leva máis de 30 anos como ilustrador de literatura infantil e xuvenil, con máis de 200 títulos publicados. A súa obra expúxose en galerías de España, Europa e Latinoamérica. Foi distinguido cos premios Gourmand World Cookbook, Fetén, Díaz Pardo, Neira Vilas e Gala do Libro Galego, ademais de figurar na lista The White Ravens e na selección da Bienal de Bratislava. Durante máis de tres décadas compartiu traballo e amizade con Xabier P. Docampo, que culminaron co libro póstumo do escritor, «O pintor cego». Xosé Cobas acaba de ilustrar «Azucre», a novela de Bibiana Candia que se publicará proximamente en KALANDRAKA.
Esta xuntanza entre Carme Solé Xosé Cobas é unha das máis de 50 actividades seleccionadas este ano a nivel estatal polo Ministerio de Cultura co obxectivo de promocionar as librarías independentes e o labor das autoras e autores, salientando a pluralidade e a diversidade lingüística e creativa. Xa está aberta a inscrición no enderezo de correo electrónico lps@kalandraka.com
CONCERTO-PRESENTACIÓN DE “PAXAROS”
A libraría LIBROS PARA SOÑAR (Triunfo, 1) de Vigo acollerá este venres, 7 de outubro, a partir das 18:00 horas e con entrada libre ata completar o aforo, a presentación de “Paxaros”, un poema musical creado pola autora arxentina Natacha Ortega e mais a ilustradora uruguaia Lucía Franco. A elas súmase o músico Mauricio Gelardi que, xunto con Natacha, forman o grupo Dragón Dorado, que interpretará melodicamente os versos deste libro publicado por KALANDRAKA. Tamén participará, como invitado especial, o músico Paco Nogueiras.
Este espectáculo é o primeiro dunha xira que, co lema “Cantos e contos”, percorrerá Galicia, Madrid e Barcelona visitando librarías, centros culturais e escolas de formación do profesorado para ofrecer presentacións, obradoiros e concertos a base de música, poesía e baile. Con esta actividade LIBROS PARA SOÑAR retoma tamén as súas sesións de animación á lectura.
Elaborada en plena pandemia, a historia de “Paxaros” remite á capacidade das nenas e dos nenos para converteren o espazo público -prazas, parques, arboredas…- en territorios lúdicos de liberdade, creatividade e imaxinación. Natacha Ortega desenvolveu esta obra como parte dunha intervención urbana no marco do proxecto infantil Gato Peludo, baseado en habitar os lugares comúns. Ademais da sinxeleza do texto, un canto aos soños da infancia, as ilustracións de Lucía Franco destacan pola súa reducida paleta cromática de vermellos e azuis, con personaxes caracterizados con picos e alas.
Finalista do XIII Premio Internacional Compostela de Álbum Ilustrado, o libro complétase con códigos QR que permiten acceder ás tres versións da canción en galego, castelán e euskara interpretadas, respectivamente, por Paco Nogueiras, Dragón Dorado e Dana Moya: linguas diferentes unidas en irmandade a través dos versos e do ritmo para ler, cantar e contar.
CON PAULA CARBALLEIRA E BONI OFOGO
A galega Paula Carballeira e o camerunés Boniface Ofogo participarán este mércores 20 de outubro, a partir das 18:00 horas na libraría LIBROS PARA SOÑAR (Triunfo, 1) de Vigo, no encontro literario Afinidades electivas que promove a Dirección Xeral do Libro e Fomento da Lectura do Ministerio de Cultura. Co lema “O valor da palabra e a transmisión oral”, compartirán a súa ampla experiencia como autores e narradores. Dirixido a público adulto e con aforo limitado, cómpre inscrición previa no enderezo de correo electrónico lps@kalandraka.com.
A obra de Paula Carballeira abrangue varios libros de poesía e de literatura infantil, entre os que destacan “O principio”, “Paco” e “Smara”, editados por KALANDRAKA. Con preto de 30 anos de experiencia como narradora, ten participado en programacións culturais tanto en Galicia como noutras partes de España, así como en Portugal, Brasil e Chile. Na súa outra faceta como actriz está vencellada ao grupo de teatro Berrobambán e tamén traballa en series de ficción para a TVG.
Orixinario dunha aldea do interior de Camerún, Boni Ofogo chegou a España en 1988 para estudar Filoloxía Hispánica e en 1992 comezou a traballar como narrador. Foi mediador intercultural no Concello de Madrid, pero dende 2005 dedícase en exclusiva a percorrer escolas, bibliotecas e centros culturais contando historias. É especialista en fábulas, lendas, mitos e tradicións da África negra. Ten actuado nos principais foros de narración a nivel estatal -Maratón de Contos de Guadalaxara, Fórum das Culturas de Barcelona, Festivais de Oralidade de Xaca e Elx…- e tamén internacionalmente: recén chegado de México, ten visitado ademais países como Francia, Brasil, Costa Rica, Colombia e Arxentina. Despois de “O león Kandinga”, o seu novo libro titúlase “A paso de tartaruga”, ambos publicados por KALANDRAKA.
“RATOS NA ESCOLA”, CON OLI
O escritor de Cangas Xosé Manuel González ‘Oli’ manterá un encontro coas lectoras e cos lectores este venres a partir das 18:00 horas en Libros para soñar (r/ Triunfo, 1) de Vigo. Trátase da primeira presentación literaria para público infantil que organiza a libraría nesta nova etapa, con inscrición previa e protocolos sanitarios. O autor daralles a coñecer a súa nova obra, “Ratos na escola”, continuación da serie ilustrada pola artista arxentina Natalia Colombo da que xa forman parte “Os ratos da casa” e “Ratos de viaxe”, publicados por KALANDRAKA.
Os protagonistas destas novas aventuras divírtense, aprenden e fan algunhas falcatruadas nas distintas dependencias dun centro de ensino, dende o ximnasio ata a biblioteca, pasando pola aula de música. Esta proposta de lectura para nenas e nenos a partir de 3 anos destaca pola súa estrutura rimada e encadeada; recursos que potencian a oralidade e o ritmo.
As ilustracións de “Ratos na escola” permanecen expostas na sala de actividades de Libros para soñar; unha proposta plástica chea de colorido e curiosos detalles: patinetes e cascos, material deportivo, instrumentos, pinturas ou libros son parte da variopinta escenogafía creada por Natalia Colombo.
Mestre de Primaria, tradutor, escritor e especialista en Literatura Infantil e Xuvenil, Xosé Manuel González ‘Oli’ é co-director da colección Seteleguas de KALANDRAKA, editorial na que tamén publicou “Once damas atrevidas”, “O pirata pata de lata” e “Artur”.
Ademais, Libros para soñar acollerá o vindeiro mércores 20 de outubro un encontro entre os escritores e narradores Paula Carballeira e Boniface Ofogo, a partir das 18:00 horas, con preinscrición no enderezo de correo electrónico lps@kalandraka.com.
Esta xuntanza literaria dirixida a público adulto enmárcase no ciclo Afinidades electivas organizado pola Dirección Xeral do Libro e Fomento da Lectura do Ministerio de Cultura. A autora galega e o contador camerunés conversarán arredor do valor da palabra e da súa transmisión oral.
RETOMAMOS AS SESIÓNS DE PROMOCIÓN DA LECTURA CON BEA CAMPOS E “A NENA E OS TRES OSOS”
Libros para soñar recibe a narradora Bea Campos, que vai representar o espectáculo “A nena e os tres osos”. A libraría retoma así as sesións de contacontos habituais dos venres, a partir das 18:00 horas, para nenas e nenos dende 3 anos. Esta actividade enmárcase nun programa de promoción da lectura que conta co apoio do Ministerio de Cultura e Deportes a través do Plan de Fomento da Lectura 2021-2024.
Nesta ocasión, Bea Campos vai ofrecer unha peza visual baseada nun dos contos clásicos da literatura infantil e xuvenil que, en KALANDRAKA, ten dúas versións: “Os tres osos” e “Rizos de Ouro e os tres osos”, ambos con adaptación de Xosé Ballesteros e ilustracións de Miguel Tanco e Oliver Douzou, respectivamente.
A función que se vai representar mañá en Libros para soñar é unha proposta teatral con monicreques e cancións: unha divertida montaxe na que unha maleta pode ser unha casa, un caldeiro pódese converter nun asento e uns calcetíns transfórmanse nunha familia de osos.
Ata fin de curso, Libros para soñar acollerá unha sesión mensual no marco desta iniciativa, en torno a temáticas, xéneros e estilos diferentes: música, lingua de signos, artes plásticas…
PRÓXIMAS SESIÓNS
Paralelamente, a libraría infantil e xuvenil do Casco Vello vigués tamén retomou esta semana as sesións especiais de contacontos para bebés de 0 a 3 anos. A próxima está programada para o vindeiro 8 de novembro. Ademais, o vindeiro venres 3 de novembro acollerá a presentación do álbum “Os migrantes”, co seu autor, o xornalista e escritor chileno Marcelo Simonetti. A forma na que a infancia aborda -con naturalidade e sen prexuízos- o encontro con persoas diferentes, procedentes doutros países e culturas, é o eixe argumental deste libro, ilustrado por Maria Girón e publicado por KALANDRAKA.
22 ANOS DE LIBROS PARA SOÑAR
A libraría LIBROS PARA SOÑAR cumprirá 22 anos neste Día do Libro e vai celebralo cunha sesión especial de contos e música para nenas e nenos a partir de tres anos, coas súas familias. Será mañá sábado, a partir das 18:00 horas, coa participación de Zeltia e Rebeca. No seu repertorio haberá historias divertidas, emocionantes e con moito ritmo, que acompañarán interpretando varios instrumentos. Entre eles, Garavanciño, un conto tradicional adaptado por Olalla González e ilustrado por Marc Taeger.
Ademais de soprar as velas e compartir a torta de aniversario co público que asista ao encontro, tamén se realizará o sorteo dunha caixa de libros. Para participar abonda con facer unha compra, que facilitará dispoñer dun boleto. Entre todos os números, elexirase un ao chou.
As actividades de animación á lectura continuarán a próxima semana, para despedir este mes de abril, cunha sesión de contos para bebés. Para asistir a esta actividade, o mércores a partir das 17:30 horas, cómpre reservar praza chamando ao 986 43 37 68 ou enviando un correo electrónico a lps@kalandraka.com
librosparasonhar.wordpress.com 