Saltar ao contido

CON PAULA CARBALLEIRA E BONI OFOGO

Outubro 18, 2021

A galega Paula Carballeira e o camerunés Boniface Ofogo participarán este mércores 20 de outubro, a partir das 18:00 horas na libraría LIBROS PARA SOÑAR (Triunfo, 1) de Vigo, no encontro literario Afinidades electivas que promove a Dirección Xeral do Libro e Fomento da Lectura do Ministerio de Cultura. Co lema “O valor da palabra e a transmisión oral”, compartirán a súa ampla experiencia como autores e narradores. Dirixido a público adulto e con aforo limitado, cómpre inscrición previa no enderezo de correo electrónico lps@kalandraka.com.

A obra de Paula Carballeira abrangue varios libros de poesía e de literatura infantil, entre os que destacan “O principio”, “Paco” e “Smara”, editados por KALANDRAKA. Con preto de 30 anos de experiencia como narradora, ten participado en programacións culturais tanto en Galicia como noutras partes de España, así como en Portugal, Brasil e Chile. Na súa outra faceta como actriz está vencellada ao grupo de teatro Berrobambán e tamén traballa en series de ficción para a TVG.

Orixinario dunha aldea do interior de Camerún, Boni Ofogo chegou a España en 1988 para estudar Filoloxía Hispánica e en 1992 comezou a traballar como narrador. Foi mediador intercultural no Concello de Madrid, pero dende 2005 dedícase en exclusiva a percorrer escolas, bibliotecas e centros culturais contando historias. É especialista en fábulas, lendas, mitos e tradicións da África negra. Ten actuado nos principais foros de narración a nivel estatal -Maratón de Contos de Guadalaxara, Fórum das Culturas de Barcelona, Festivais de Oralidade de Xaca e Elx…- e tamén internacionalmente: recén chegado de México, ten visitado ademais países como Francia, Brasil, Costa Rica, Colombia e Arxentina. Despois de “O león Kandinga”, o seu novo libro titúlase “A paso de tartaruga”, ambos publicados por KALANDRAKA.

“RATOS NA ESCOLA”, CON OLI

Outubro 6, 2021

O escritor de Cangas Xosé Manuel González ‘Oli’ manterá un encontro coas lectoras e cos lectores este venres a partir das 18:00 horas en Libros para soñar (r/ Triunfo, 1) de Vigo. Trátase da primeira presentación literaria para público infantil que organiza a libraría nesta nova etapa, con inscrición previa e protocolos sanitarios. O autor daralles a coñecer a súa nova obra, “Ratos na escola”, continuación da serie ilustrada pola artista arxentina Natalia Colombo da que xa forman parte “Os ratos da casa” e “Ratos de viaxe”, publicados por KALANDRAKA.

Os protagonistas destas novas aventuras divírtense, aprenden e fan algunhas falcatruadas nas distintas dependencias dun centro de ensino, dende o ximnasio ata a biblioteca, pasando pola aula de música. Esta proposta de lectura para nenas e nenos a partir de 3 anos destaca pola súa estrutura rimada e encadeada; recursos que potencian a oralidade e o ritmo.

As ilustracións de “Ratos na escola” permanecen expostas na sala de actividades de Libros para soñar; unha proposta plástica chea de colorido e curiosos detalles: patinetes e cascos, material deportivo, instrumentos, pinturas ou libros son parte da variopinta escenogafía creada por Natalia Colombo.

Mestre de Primaria, tradutor, escritor e especialista en Literatura Infantil e Xuvenil, Xosé Manuel González ‘Oli’ é co-director da colección Seteleguas de KALANDRAKA, editorial na que tamén publicou “Once damas atrevidas”, “O pirata pata de lata” e “Artur”.

Ademais, Libros para soñar acollerá o vindeiro mércores 20 de outubro un encontro entre os escritores e narradores Paula Carballeira e Boniface Ofogo, a partir das 18:00 horas, con preinscrición no enderezo de correo electrónico lps@kalandraka.com.

Esta xuntanza literaria dirixida a público adulto enmárcase no ciclo Afinidades electivas organizado pola Dirección Xeral do Libro e Fomento da Lectura do Ministerio de Cultura. A autora galega e o contador camerunés conversarán arredor do valor da palabra e da súa transmisión oral.

ACTIVIDADES PRESENCIAIS A PARTIR DE OUTUBRO

Setembro 10, 2021

A libraría Libros para soñar (rúa Triunfo, 1) de Vigo vai recuperar as actividades presenciais de animación á lectura o vindeiro mes de outubro, cunha nova programación que inclúe presentacións de libros, sesións de contacontos para bebés e para nenas e nenos a partir de catro anos, e unha nova exposición de ilustracións que, neste caso, xa se pode visitar. Trátase da obra da autora arxentina Natalia Colombo para “Ratos na escola”, un texto do autor cangués Xosé Manuel González ‘Oli’ publicado por KALANDRAKA.

Precisamente, Xosé Manuel González será o invitado da primeira presentación, o venres 8 de outubro. “Ratos na escola” é o terceiro volume dunha serie formada por “Os ratos da casa” e “Ratos de viaxe”, ilustrados igualmente por Natalia Colombo. Nesta nova entrega, os protagonistas acoden ao colexio, onde descobren algunhas das cousas poden facer nas súas aulas: pintar, ler, tocar instrumentos musicais… Como nos títulos anteriores, as imaxes sobresaen polo seu colorido e acentúan o ton divertido da obra, cunha estrutura narrativa rimada a base de palabras e versos encadeados.

A segunda presentación celebrarase o venres 22 de outubro co narrador oral camerunés Boniface Ofogo, que falará do seu novo libro no catálogo de KALANDRAKA, “A paso de tartaruga”, ilustrado por Rebeca Luciani, ademais de repasar outros títulos da súa autoría como “O león Kandinga”. Ambos son lendas tradicionais da milenaria cultura africana, na que o autor -con trinta anos de experiencia dedicándose a contar contos- é especialista.

CONTACONTOS PARA BEBÉS

Ademais dos encontros con autores, tamén volverán a Libros para soñar -que vén de cumprir 20 anos- as sesións de contacontos: a narradora Bea Campos e o músico Manuel Pombo van inaugurar o programa de actividades o vindeiro venres 1 de outubro cun repertorio de historias co lema “Os tres porquiños e outros contos”, no que destacan os relatos clásicos. As libreiras Sandra Senra e Carmela Sieiro participarán nos contacontos previstos os días 15 e 29, titulados “Ernesto e outros elefantes” e “Aurelio, un morcego que non dá medo”, respectivamente.

Canda as actividades para público infantil a partir de catro anos, tamén se retomarán as sesións especiais para bebés: serán os mércores 6 e 20 de outubro. Debido á limitación do aforo e ao reducido número de prazas, nas dúas datas haberá unha quenda dobre para favorecer a maior asistencia posible a estas actividades nas que se prioriza a estimulación sensorial e a psicomotricidade das meniñas e dos meniños con libros acordes á súa idade, cantos de berce ou cantigas tradicionais.

En todas as actividades aplicarase rigorosamente o protocolo sanitario, comezando pola inscrición previa das persoas interesadas a través do enderezo de correo electrónico lps@kalandraka.com.

“IMOS FACER UN LIBRO”, CON RAMÓN TRIGO

Agosto 11, 2021

O artista vigués Ramón Trigo vai impartir un obradoiro de creación plástica co lema “Imos facer un libro”, dirixido a nenas e nenos a partir de 6 anos. Será unha actividade gratuita e realizarase en LIBROS PARA SOÑAR os días 1, 2 e 3 de setembro de 11:00 a 13:00 horas. A partir da súa ampla experiencia como autor e ilustrador duns corenta títulos, Ramón Trigo artellará unha proposta adaptada ao público infantil a través da aplicación de técnicas e materiais asequibles, primando o criterio lúdico e a participación.

O obxectivo do taller é estimular a imaxinación dos máis novos, que se manteñan activos durante as vacacións de verán, e que desenvolvan as súas habilidades desenvolvendo historias e personaxes, ao tempo que as nais e os pais atopan neste taller un apoio para poderen conciliar a vida laboral e familiar.

Ademais de autor e ilustrador, Ramón Trigo ten dirixido numerosos cursos para público infantil e adulto. De formación autodidacta, iniciou a súa traxectoria artística en xornais e revistas especializadas en banda deseñada. As súas primeiras obras pictóricas datan da década de 1980; dende entón ilustra libros para varias editoriais -algúns incluídos na selección The White Ravens- e realiza exposicións cos seus cadros e esculturas.

Ten presentado a súa obra en países como Alemaña, Bélxica, Lituania, Italia e Portugal. Entre as distincións que recibiu destacan o Premio Arte Xove Galego, os premios de álbum ilustrado infantil Cidade de Alacant e Cabildo de Gran Canaria. Entre os seus libros para público infantil e xuvenil destacan « O pirata Pata de Lata» e « Leviatán», publicados por KALANDRAKA. Este último gañou o Premio Lazarillo 2012 e o Premio Isaac Díaz Pardo de Ilustración 2015 outorgado pola Asociación Galega de Editoras.  

Precisamente, a balea que protagoniza «Leviatán» é un dos elementos de temática mariñeira que Ramón Trigo trasladou, en 2016, a unha parede de case 30 metros de lonxitude entre as rúas Marqués de Valladares e Torrecedeira. Non é o único gran mural realizado polo artista vigués na súa cidade, onde tamén pintou un muro de lonxitude semellante ao anterior no colexio Monte da Guía, en Teis.

O prazo de inscrición no taller “Imos facer un libro” xa está aberto, con prazas limitadas. As familias interesadas poden apuntarse en LIBROS PARA SOÑAR (rúa Triunfo 1, Vigo) chamando ao número de teléfono 986 43 37 68.

[Obradoiro organizado cunha axuda para actividades de difusión do libro e a lectura 2021 da Xunta de Galicia]

LIBROS PARA SOÑAR CUMPRE 20 ANOS NO DÍA DO LIBRO

Abril 22, 2021

LIBROS PARA SOÑAR celebra mañá o seu 20º aniversario coincidindo co Día do Libro. A libraría infantil e xuvenil do Casco Vello de Vigo vai compartir esta data tan especial coas lectoras e cos lectores ofrecendo o habitual desconto pola compra de exemplares. Ademais, a través das súas canles nas redes sociais, publicará un vídeo conmemorativo elaborado por KALANDRAKA TV repasando estas dúas décadas de traxectoria como especialista nos libros e na lectura para a infancia e a mocidade.

Unha das facetas que distinguiu a LIBROS PARA SOÑAR dende os seus inicios na rúa Triunfo foi a posta en marcha dunha programación estable de actividades de animación á lectura para nenos e nenas a base de contacontos, encontros con autores e ilustradores, exposicións de ilustración e obradoiros de plástica creativa. Co tempo, tamén foi a primeira libraría en realizar sesións específicas para bebés, asesorando os adultos sobre os materiais e os recursos máis axeitados para as primeiras idades.

Por LIBROS PARA SOÑAR teñen pasado destacadas figuras da Literatura Infantil e Xuvenil: autores como Xosé Manuel González ‘Oli’, Olalla González, Paula Carballeira, Fran Alonso, Tim Bowley… ilustradores como Ramón Trigo, Federico Fernández, Óscar Villán, Marc Taeger, David Pintor, Michael Grejniec… músicos como Paco Nogueiras, Xurxo Souto, Xabier Díaz… As actividades tamén abrangueron a formación dos adultos -profesorado, persoal de bibliotecas, mediación lectora, familias- con charlas formativas e cursos de contacontos.

A pandemia non permite -como xa sucedeu o pasado ano- celebrar este vixésimo cumpreanos coa tradicional festa de contos, música e petiscos. Durante este tempo de restricións por causas sanitarias e de responsabilidade social, a libraría adaptou os seus horarios e os seus servizos, mantendo o contacto coas lectoras e cos lectores a través das redes sociais e facendo envíos a domicilio. Dúas décadas que chegan en tempos de máscaras, distancias e hidroxel, mais con agradecemento ás familias, ás nenas e aos nenos que medraron visitando LIBROS PARA SOÑAR, e coa confianza de retomar a cercanía cando as circunstancias o permitan.

LIBROS PARA SOÑAR… CUMPRE 20 ANOS!

Abril 2, 2021

LIBROS PARA SOÑAR cumpre 20 anos este vindeiro 23 de abril, Día do Libro. Para celebrar este aniversario tan especial e compartilo coas nenas e nenos, coas familias, cos docentes, persoal das bibliotecas e da mediación lectora, e con todas as persoas que len e soñan connosco, dedicaremos cada venres deste mes a contar un conto.

Comezamos este 2 de abril, Día do Libro Infantil e Xuvenil, cun dos máis emblemáticos do catálogo de KALANDRAKA: “O coelliño branco”, co seu autor, Xosé Ballesteros. As ilustracións desta obra, de Óscar Villán, foron distinguidas co Premio Nacional de Ilustración 1999, entre otros recoñecementos. Moito rimos e desfrutamos coas andanzas deste entrañable personaxe tratando de librarse da cabra cabresa, cabraza, caburra…

“O coelliño branco”, narrado por Xosé Ballesteros nos Contos Contados de KALANDRAKA TV

Tampouco faltarán os simpáticos “Chibos chibóns”, “A Cebra Camila” co seu vestido de raias e probaremos “A que sabe a lúa?”, entre outras historias nas que tampouco faltarán a música e o baile.

Agardámosvos este luns para seguirmos celebrando o Día do Libro Infantil e Xuvenil cun desconto pola compra de libros. Ademais, a sala de actividades de LIBROS PARA SOÑAR estrea nova exposición, coas ilustracións alegres e coloridas de “Paxaros”, de Lucía Franco, para un poema-canción de Natacha Ortega.

Non perdas o booktrailer de “Paxaros“, con música e voz de Paco Nogueiras

PACO NOGUEIRAS E MARC TAEGER PRESENTAN ‘EXTRA!’

Decembro 9, 2020

O músico Paco Nogueiras e o artista plástico Marc Taeger visitarán este venres LIBROS PARA SOÑAR (Triunfo nº1, Vigo) para presentar «Extra!», un novo libro-disco publicado por KALANDRAKA cunha ducia de cancións nas que a prensa escrita é o fío condutor. Dispostas como as noticias das distintas seccións -actualidade nacional e internacional, sucesos, cultura, deportes…- dun xornal, Paco Nogueiras é o compositor e intérprete dos temas, ilustrados por Marc Taeger. Os autores participarán en dous encontros, ás 17:30 e ás 18:30 horas, para público adulto: docentes, mediadores, persoal de bibliotecas… son os destinatarios destas sesións especiais, con aforo reducido e protocolos sanitarios, nas que tamén asinarán exemplares. Cómpre inscrición previa no enderezo de correo electrónico lps@kalandraka.com.

Porque a prensa é un valioso recurso na escola e no fogar para animar á escrita, á plástica creativa, para desenvolver habilidades lectoras, a curiosidade e a imaxinación, mais tamén para dinamizar a socialización, o traballo en equipo e adquirir habilidades tecnolóxicas… este libro-disco destaca pola versatilidade e o carácter lúdico. Acompáñase dun mini-xornal con información e pasatempos.

Fiel á frescura do seu estilo e á súa conexión co público infantil, Paco Nogueiras coida as letras das composicións e as melodías, que destacan polos ritmos modernos, pegadizos e bailables, invitando á participación do público. Pola súa banda, Marc Taeger desdobra a figura de Paco Nogueiras en numerosas e divertidas facetas cheas de colorido, dinamismo e expresividade. Sempre cos seus característicos lentes e co inseparable chapeu azul, o protagonista convértese en repartidor e lector de periódicos, nun entusiasta cronista do mundo, ao ritmo da música.

«Extra!» é o terceiro libro-disco de Paco Nogueiras despois de «Radio Bulebule» e «Brinca vai!» (III Premio Martín Códax da Música na categoría infantil) que, deron pé a centos de actuacións por toda Galicia. Como nos traballos precedentes, «Extra!» tamén conta co apoio dos videoclips dirixidos por José Miguel Sagüillo.

CONTACONTOS DE NADAL E PRESENTACIÓN DE ‘O BOLERO DE RAVEL’

Novembro 25, 2020

LIBROS PARA SOÑAR (rúa Triunfo, 1) retransmitirá este venres, a partir das 18:00 horas e a través das súas canles en Facebook e mais Instagram, unha nova sesión virtual de contacontos coa narradora Bea Campos e co músico Manuel Pombal. Dirixida a nenas e nenos a partir de seis anos e ás familias, o fío condutor das historias será o Nadal. Ademais das actividades en liña, a libraría infantil e xuvenil do Casco Vello vigués continúa realizando encontros presenciais: este sábado organiza unha presentación para público adulto -docentes, mediadores…- do libro musical “O Bolero de Ravel”, con dúas quendas ás 11:30 e ás 12:30 horas.

Despois de “As catro estacións: Vivaldi” ilustrado por Emilio Urberuaga, “O carnaval dos animais: Saint-Saëns” coa proposta plástica de João Vaz de Carvalho e “Cadros dunha exposición: Mussorgsky” con ilustracións de Xosé Cobas, a colección de música clásica -que presenta textos de José Antonio Abad realizados a partir das composicións- suma este afamado clásico de Maurice Ravel, con Federico Delicado como ilustrador.

Fronte aos títulos anteriores publicados en formato libro-disco, este novo título ofrece a posibilidade de escoitar distintas audicións do Bolero a través de códigos QR que conducen aos concertos de prestixiosas orquestras: Sinfónica de Galicia, Filharmónica de Viena…

Ademais, a libraría acolle unha exposición das ilustracións de Federico Delicado, nas que destaca a representación dos músicos como animais humanizados, coa particularidade de que as especies escollidas están en perigo de extinción. A presentación deste libro, a cargo da narradora Bea Campos, ten capacidade limitada, polo que cómpre inscrición previa no enderezo de correo electrónico lps@kalandraka.com.

A axenda de actividades do mes de decembro comezará o próximo mércores día 2 cunha sesión presencial de contacontos para bebés de 0 a 3 anos, impartida polas libreiras Sandra Senra e Carmela Sieiro. Atendendo á capacidade limitada da sala, realizarase en dúas quendas ás 17:30 e ás 18:15 horas, polo que cómpre inscribirse con antelación en lps@kalandraka.com.

DÍA DAS LIBRARÍAS

Novembro 10, 2020

LIBROS PARA SOÑAR retomará este venres -con motivo do Día das Librarías- as súas actividades de animación á lectura. As canles de LIBROS PARA SOÑAR en Facebook e Instagram ofrecerán, a partir das 18:00 horas, unha sesión de contacontos e música dirixida a nenas e nenos a partir de 6 anos, con Bea Campos e Manuel Pombal. Co lema Outono de contos e música, non faltarán «O coelliño branco» e as súas peripecias intentando preparar un caldo, xunto co clásico de Gianni Rodari «Que fai falta?», no centenario do autor, entre outras historias do catálogo de KALANDRAKA.

Ademais, os artistas vigueses Federico Fernández e Ramón Trigo visitarán LIBROS PARA SOÑAR a partir das 19:00 horas para asinar as súas obras, seguindo as medidas de seguridade sanitaria. As lectoras e lectores poderán contactar coa libraría para reservar exemplares e indicar a quen queren que os ilustradores llos dediquen. Federico Fernández é ilustrador do libro para pre-lectores «Aurelio», do conto tradicional «Chibos chibóns» e coautor do libro visual «Balea». Cunha ampla bibliografía, ademais de ilustrar «O pirata pata de lata», Ramón Trigo tamén é o artífice de «Leviatán» e doutras moitas publicacións.

Xunto con destes autores, será posible reservar exemplares e sinaturas da obra de Ledicia Costas, que estará en LIBROS PARA SOÑAR o próximo 20 de novembro.

LIBROS PARA SOÑAR continuará organizando contacontos con música ao longo de novembro e decembro, tanto para público infantil como para bebés, neste caso de forma presencial acompañados de adultos.

Mantendo o seu compromiso coa educación plástica dos máis cativos e coa posta en valor da arte, a sala de actividades de LIBROS PARA SOÑAR acolle ata finais de ano a exposición das ilustración do libro musical «O Bolero de Ravel», realizadas por Federico Delicado a partir dun texto de José Antonio Abad. Trátase de sorprendentes imaxes nas que os músicos que protagonizan a historia son animais humanizados representando especies en perigo de extinción.   Ambientadas nun escenario urbano, transportan as lectoras e os lectores a un memorable concerto que, ademais de música, tamén destaca pola luminosidade e o colorido de cada páxina. Ademais de «O Bolero de Ravel», a traxectoria de Federico Delicado tamén destaca por títulos como «Ícaro» (VII Premio Compostela de Álbum Ilustrado), «Mundinovi» (VIII Premio Cidade de Orihuela de Poesía para Nenas e Nenos), «O neno bisesto» e «Unha longa viaxe», entre outros. 

LIBROS PARA SOÑAR ABRE O 11 DE MAIO

Maio 6, 2020
tags:

Interior de LIBROS PARA SOÑAR

 

Estimadas amigas e amigos de LIBROS PARA SOÑAR

A libraría cumpriu 19 primaveras neste pasado mes de abril; foi un aniversario atípico e cheo de ausencias: sen contacontos, sen música, sen petiscos e, sobre todo, sen a vosa compañía. Unha terrible pandemia obrigounos a facer unha paréntese necesaria para velar pola saúde de todas e todos, malia que levou por diante a vida de milleiros de persoas.

Durante este longo tempo, de consignas como #QuedaNaCasa e de aplausos de recoñecemento a quen traballa arreo polo ben común, os libros e a cultura veñen sendo bálsamo e refuxio ante a desazón, no lento transcurso dos días. Dende LIBROS PARA SOÑAR tamén achegamos o noso gran de area aos Contos Contados de KALANDRAKA TV para acompañar as familias e apoiar a comunidade escolar nestes momentos.

Agora que a situación sanitaria xa ofrece datos alentadores e anúnciase unha progresiva recuperación da actividade interrumpida, estamos felices de comunicarvos que LIBROS PARA SOÑAR volverá abrir as súas portas o vindeiro 11 de maio. Retornamos coa ilusión do encontro, malia que impere a prudente distancia de seguridade: as palabras, os xestos e a expresión da mirada serán a alternativa ás apertas…

Establecerase un horario de 11:00 a 13:00h e de 17:30 a 19:30h para atender as visitas de xeito individual e seguindo os protocolos de protección. Poderanse enviar encargos por correo electrónico ao enderezo lps@kalandraka.com para a súa recollida na libraría. A partir do próximo luns tamén se responderán as consultas que desexedes formular a través do email de LIBROS PARA SOÑAR e ofreceremos asesoramento especializado e personalizado. Para facilitar as vosas lecturas, imos contar cun servizo de entrega a domicilio, áxil e asequible. E, para calquera cuestión urxente, estamos ao voso dispór no número de teléfono 986433768.

Ábrese unha nova etapa na que esperamos contar co apoio de todas e todos, que fixestes posible chegarmos ata aquí. Agardámosvos cos libros (e cos brazos) abertos!

 

Sandra Senra e Carmela Sieiro, libreiras de LIBROS PARA SOÑAR