Skip to content

FESTA DOS 17 ANOS DE LIBROS PARA SOÑAR

Abril 18, 2018

Festa dos 17 anos de LIBROS PARA SOÑAR

LIBROS PARA SOÑAR celebrará o seu aniversario o vindeiro luns, 23 de abril, Día do Libro, e con tal motivo, adiantará a celebración a este venres 20 para facela coincidir coa sesión habitual de contacontos, ás 18:30 horas. Nesta ocasión especial, aberta ao público, os protagonistas serán usuarios e usuarias da libraría, lectoras e lectores, nais e pais que ao longo destes 17 anos de traxectoria teñen contribuído coa súa presenza, a súa complicidade e o seu compromiso a que LIBROS PARA SOÑAR fose sumando anos.

Será unha sesión emotiva e chea de sorpresas na que non faltará a clásica torta de cumpreanos para que os nenos e as nenas axuden a soprar as velas no aniversario da libraría infantil e xuvenil do Casco Vello.

LIBROS PARA SOÑAR fai un balance intenso destes últimos doce meses, nos que contou con autores como Xosé Ballesteros presentando a súa adaptación do clásico “Os tres porquiños”; ou os creadores de “Un máis”, Olalla González e Marc Taeger. Tampouco faltaron artistas como o vigués Ramón Trigo, que impartiu un orixinal taller de ilustración, e as actividades musicais, da man de destacados intérpretes como Susa Herrera e César Freiría á fronte do proxecto Cé Orquestra Pantasma, ademais do concerto de Paco Nogueiras coas cancións de “Radio Bulebule” e grupos como Pesdelán e A Banda dos Cueiros.

Este luns, LIBROS PARA SOÑAR sumarase á tradicional campaña de promoción co gallo do Día do Libro, ofrecendo un 10% de desconto no importe das compras.

O programación deste abril dos libros e da lectura rematará o venres 27 cun obradoiro de plástica creativa co lema “Creando historias, creando contos”. Ata finais de mes aínda se pode visitar a exposición de ilustracións de Elizabeth Builes para o poemario “Arroz con leche”, de Natalí Tentori, distinguido co IX Premio Cidade de Orihuela de Poesía para Nenas e Nenos.

Advertisements

CONTOS EN FEMININO (I)

Marzo 1, 2018

Actividades de marzo de 2018 en LIBROS PARA SOÑAR

LIBROS PARA SOÑAR dedicará a sesión de mañá venres, a partir das 18:30 horas, e tamén a da próxima semana, aos Contos en feminino co gallo do Día da Muller, que se celebrará o vindeiro xoves 8 de marzo. Con ese lema, a libraría infantil do Casco Vello vigués artellará un repertorio de relatos protagonizados por figuras femininas ou creadas por escritoras e ilustradoras. O clásico “Rosa caramelo”, de Adela Turín e Nella Bosnia, será unha das obras narradas.

Nos anos 70 Adela Turin e Nella Bosnia foron pioneiras na introdución dos conceptos de igualdade e coeducación na literatura infantil. “Rosa caramelo” é un dos títulos máis emblemáticos da colección “Dalla parte delle bambine”, que foi publicada en España por Esther Tusquets como “A favor de las niñas”, recuperada actualmente por KALANDRAKA. Narra a historia da elefanta Margarida que, coma outras da súa especie, vive aillada nun xardín alimentándose de anémonas e peonias para ter unha pel rosada, e vestindo zapatos, lazos e colares desa cor. Só ela incumpre as expectativas da súa nai e do seu pai, que desisten de que sexa coma as demais.

Baixo esta historia fabulada subxacen cuestións como un superficial culto á imaxe, ou a crítica a unha sociedade que predestina o futuro dos seus individuos e clasifícaos en función do seu xénero. Pero sobre todo, é un canto á liberdade que contribúe a pór en valor o rol feminino na sociedade, erradicar os estereotipos sexistas e a discriminación, e cambiar mentalidades para construír un mundo mellor.

A sesión de contacontos completarase con outro clásico da Literatura Infantil e Xuvenil contemporánea, “Os petos de Loreto”, de Quentin Blake, e coa obra “Once damas atrevidas”, do autor de Cangas Xosé Manuel González ‘Oli’, ilustrado por Helle Thomassen. Ambos son textos rimados para primeiros lectores protagonizados por mulleres audaces e imaxinativas.

Ademais, durante este mes de marzo, a sala de actividades de LIBROS PARA SOÑAR acolle a exposición das ilustracións de Elizabeth Builes para o poemario “Arroz con leche”, de Natalí Tentori, distinguido co IX Premio Internacional Cidade de Orihuela para Nenas e Nenos e publicado por KALANDRAKA.

Esta obra sobre a esencia do feminino, da amizade, da maternidade e do vínculo entre fillas, nais e avoas, está relacionada coa campaña #NiUnaMenos contra a violencia de xénero, que se desenvolveu en Arxentina a través das redes sociais.

EN XANEIRO, CONTOS POLA PAZ

Xaneiro 16, 2018

 

Programación de xaneiro en Libros para soñar

LIBROS PARA SOÑAR retoma, trala pausa do Nadal, a súa programación habitual de actividades de animación á lectura, tanto os mércores cada quince días para pre-lectores, como cada venres para nenas e nenos a partir de 3 anos.

Co gallo da celebración do Día Escolar pola Paz e a Non Violencia o vindeiro 30 de xaneiro, as sesións de contacontos dos días 19 e 26 ás 18:30 horas estarán dedicadas aos contos pola paz. No último venres deste mes presentarase o libro “Por qué?“, de Nikolai Popov: sen texto, só coa forza expresiva e gráfica das imaxes, trata sobre a sinrazón das guerras dende o punto de vista asequible para todos os públicos.

A primeira sesión de contacontos para bebés -con asistencia previa inscrición- celebrarase o día 24 ás 17:30 horas.

E a sala de exposicións de LIBROS PARA SOÑAR segue ocupada polas divertidas ilustracións de David Pintor para o libro-disco “Radio Bulebule“, de Paco Nogueiras, que inclúe uns abraiantes videoclips de José Miguel Sagüillo.

DSC_0069

BO NADAL!

Decembro 18, 2017
tags:

Dende LIBROS PARA SOÑAR desexámosvos

FELICES FESTAS!

FELICES LECTURAS!

Dende LIBROS PARA SOÑAR, Felices Festas e Felices Lecturas!

 

CONCERTO DE ‘RADIO BULEBULE’ CON PACO NOGUEIRAS

Decembro 16, 2017

Paco Nogueiras e Sr.Sagüillo presentáronnos RADIO BULEBULE

LIBROS PARA SOÑAR encheuse de público para recibir a Paco Nogueiras, que nos presentou o seu novo libro-disco, “Radio BULEBULE“, nun divertido concerto. Canda el, José Miguel Sagüillo, director da curtametraxe que acompaña a obra e que nos presentou o videoclip da primeira canción. Non puido acompañarnos o ilustrador David Pintor, pero o seu traballo -cheo de colorido- acompáñanos durante todo este Nadal na sala de actividades.

 

A libraría foise convertendo nunha emisora dende a que saían as “ondas falangueiras” de “Radio BULEBULE” e Paco Nogueiras exerceu de locutor, músico e intérprete dunha escolma de cancións: ‘Pelos, melena’, ‘Teño que investigar’, ‘Éxito vogal’…

As noticias, os deportes, o tempo, a axenda cultural, as tendencias de moda, a ciencia… ¡cantas cousas interesantes na programación de “Radio BULEBULE”!

“Hoxe levanteime científico, matemático, algo químico;
hoxe levanteime científico e teño que investigar.
Hoxe levanteime científico, tecnolóxico, tamén físico;
hoxe levanteime científico e teño que investigar…”

Paco Nogueiras presentounos RADIO BULEBULE en Libros para soñar

En lingua de signos, cantamos e bailamos…

“Vou idear unha canción
para que todos bailen ao seu son.
Coas cinco vogais e un par de letras máis…
Vou idear unha canción…”

Paco Nogueiras presentounos RADIO BULEBULE en Libros para soñar

Paco dedicou moitos exemplares de “Radio BULEBULE”. Non faltaron as fotos de recordo como colofón a un concerto inesquecible.

Durante este Nadal non esquezades visitar a exposición de ilustracións de David Pintor.

Paco Nogueiras presentounos RADIO BULEBULE en Libros para soñar

Paco Nogueiras presentounos RADIO BULEBULE en Libros para soñar'

Moitas grazas, Paco e Sr.Sagüillo por visitarnos!

Paco Nogueiras presentounos RADIO BULEBULE en 'Libros para soñar'

OLALLA E MARC PRESENTAN ‘UN MÁIS’

Novembro 6, 2017

Olalla González e Marc Taeger presentaron "Un máis" e contaron outros contos da súa autoría.

Olalla González e Marc Taeger presentaron o seu novo libro, “Un máis“; segunda obra conxunta da mestra, contacontos e especialista en animación á lectura, e do ilustrador de orixe suíza. Canda a historia do simpático coelliño que agarda con impaciencia e ilusión a chegada dun novo bebé á familia, non faltaron outros contos da súa autoría: “A verdadeira historia de Carapuchiña Vermella“, ilustrada por Marc a partir do texto do prestixioso folclorista Antonio Rodríguez Almodóvar; e o conto tradicional “Garavanciño“, que foi o seu primeiro traballo xuntos.

Olalla González e Marc Taeger presentaron "Un máis" e contaron outros contos da súa autoría.

«Había unha vez unha nena moi xeitosiña que vivía nunha aldea, preto dun bosque.  Chamábanlle Carapuchiña, ou Carapuchiña Vermella, porque a súa avoa, que vivía noutra aldea dos arredores, regaláralle unha capa desa cor, cunha carapucha para o frío…»

Olalla González e Marc Taeger presentaron "Un máis" e contaron outros contos da súa autoría.

Olalla González e Marc Taeger presentaron "Un máis" e contaron outros contos da súa autoría.

Sorpresa colectiva… ao comprobar a orixinal versión ilustrada de Marc para o conto de Carapuchiña, ambientada nas típicas celebracións mexicanas arredor do Día dos Mortos, equivalentes ao Samaín galego.

Olalla González e Marc Taeger presentaron "Un máis" e contaron outros contos da súa autoría.

E a ritmo de “pachín, pachán, pachón…” ela contou, el ilustrou e todos cantamos a melodía de “Garavanciño”:

«Había unha vez unha familia que tiña un fillo moi pequeno, tan pequeno coma un garavanzo. Por iso decidiron chamarlle Garavanciño. Un día cando a súa nai estaba facendo o xantar, notou que lle faltaba o azafrán. Garavanciño axiña se ofreceu para ir á tenda. A nai nunca o deixaba saír só da casa porque tiña medo de que a xente non o vise e o pisase. Pero Garavanciño insistiu. Díxolle á súa nai que iría cantando; así, aínda que non o visen, sentiríano e ninguén o pisaría…»

DSC_0424

«Un día, o pequeno coello mirou a súa mamá e dixo:
–Mamá, estás moi gorda. Creo que vas ter un bebé!
–Pois si, dentro de pouco seremos máis.
–E cando vai nacer?
–Cando xa non poida ver os meus pés…»

Olalla González e Marc Taeger presentaron "Un máis" e contaron outros contos da súa autoría.

Olalla González e Marc Taeger presentaron "Un máis" e contaron outros contos da súa autoría.

Contando “Un máis” esta sesión especial de contacontos chegou ao seu fin, cos autores dedicando exemplares dos seus libros. Mais o eco deste relato e as suaves tonalidades deste álbum quedan un tempo máis entre as paredes de LIBROS PARA SOÑAR porque ata finais deste mes de setembro, na sala de actividades da libraría permanecen expostas as ilustracións de Marc Taeger.

…Moitas grazas aos dous por volver visitarnos!

Escaparate de "Un máis" en LIBROS PARA SOÑAR

OLALLA GONZÁLEZ E MARC TAEGER PRESENTAN ‘UN MÁIS’

Outubro 30, 2017

Olalla González e Marc Taeger, autores de "Un máis"

LIBROS PARA SOÑAR acollerá este venres 3 de novembro, a partir das 18:30 horas, a presentación de “Un máis”, o novo álbum ilustrado de Olalla González e Marc Taeger, publicado por KALANDRAKA e dirixido a primeiros lectores. Trátase dunha historia protagonizada por unha familia que vai medrar coa chegada dun bebé. As ilustracións desta obra permanecerán expostas na libraría durante o todo o mes.

O relato céntrase na curiosidade do personaxe principal, un pequeno coello, polo tempo que tardará en nacer o seu irmán ou irmá; unha dúbida que lle traslada de xeito insistente non só á súa nai, senón tamén a outros habitantes do bosque. Mentres, o coelliño imaxina os xogos que poderán compartir xuntos.

Tenrura, solidariedade, ledicia, emoción -e unha sorpresa final- son os sentimentos presentes neste libro, ilustrado con acuarelas de tons suaves sobre fondo branco. A nivel artístico, destaca a diferenza entre as escenas a toda cor e as imaxes monocromáticas, para distinguir a parte imaxinaria do conto que representa os soños e os desexos do protagonista.

Publicado en sete linguas -as cinco peninsulares, inglés e italiano-, “Un máis” é o segundo libro conxunto destes autores afincados no Morrazo, logo da súa adaptación do conto tradicional “Garavanciño”. Olalla González, que é mestra, contacontos e especialista en animación á lectura, tamén adaptou “Chibos chibóns”, ambos en KALANDRAKA.

Nesta editorial publicáronse tamén varias obras de Marc Taeger, comezando por “A verdadeira historia de Carapuchiña”, que recibiu os Premios Daniel Gil 2005 de ilustración e de deseño. Seguíronlle “Aquiles o puntiño”, o libro-disco “Tic-Tac”, “Elefante comellón”, xunto con “Artur” e “A guía Necsia”, estas últimas no selo FAKTORÍA K. O artista suízo afincado é autor dun amplo abano de traballos de deseño, pintura, escultura e arte gráfica que foron expostos en Francia, Alemaña, China ou Costa Rica, entre outros países.

Na súa visita á libraría infantil do Casco Vello vigués, Olalla González e Marc Taeger ofrecerán unha sesión de contacontos mesturando narración e ilustración en directo, non só de “Un máis” como principal novidade, senón tamén doutras obras da súa autoría. Ao remate da actividade asinarán exemplares.