FESTA DE CONTACONTOS DO 15º ANIVERSARIO DE LIBROS PARA SOÑAR
LIBROS PARA SOÑAR celebrou o seu 15º aniversario cos nenos e nenas, coas mamás e papás, cos amigos e amigas que veñen participando nas actividades da libraría infantil do Casco Vello de Vigo ao longo da súa traxectoria. Invitámosvos a un anaquiño desta torta especial de cumpreanos, inspirada na figura tan querida de Frederick, feita coa masa da ilusión, recuberta co chocolate da fantasía, decorada coas cores da imaxinación… e que sabe a conto.
A libraría quedou pequena para escoitar e compartir historias.
O mal tempo non fixo mella na afluencia de público e encheu a libraría co colorido dos paraugas e dos chuvasqueiros.
Non faltou un bo feixe de carriños de bebés, que tamén se quixeron sumar a esta cita tan especial.
Con Manuela contamos e cantamos o conto elixido para personalizar a torta de cumpreanos: “Cores“, de Leo Lionni, cos versos de Antonio Rubio.
Foron moitas as peticións para que Xosé Ballesteros contara por enésima vez “O coelliño branco“, pero sorprendeunos cun conto moi orixinal dunha princesa e dun príncipe, dunha bruxa que o enfeitiza…
Iria contounos o seu conto preferido: “Oh!“, de Josse Goffin… e con ela aprendemos un xeito divertido e musical para lavar os dentes.
Non podía faltar a voz das mamás e dos papás que lles contan contos aos seus fillos e fillas. Cristina agasallounos cun relato con forma de mazá.
Como anfitrionas da velada, Sandra e Bea traían unha torta dentro das páxinas dun libro…
E mentres Marga e Xaime comezaban a amenizar coa súa música unha celebración que ía chegando ao seu fin…
…Carmela chegou á sala portando a torta coa súa candea prendida, ante o asombro de pequenos e maiores.
O pequeno Xoel uniuse aos seus pais para entoar unha canción de cumpreanos que nos emocionou moito:
…Parabéns para voçé, nesta data querida, moitas felicidades, moitos anos de vida…
E co alento de todos os nenos e nenas, das mamás e dos papás, fomos quen de apagar a vela dos 15 anos de LIBROS PARA SOÑAR. Día inesquecible, polo agarimo recibido, polo entusiasmo compartido.
Só quedaba compartir con tod@s esta torta literaria.
Dende a pequena gran familia de LIBROS PARA SOÑAR, moitas GRAZAS por acompañarnos nesta tarde tan marabillosa e pola vosa confianza durante estes 15 anos. Longa vida!
Trackbacks