A DIVERTIDA HISTORIA DE ‘NICOMEDES O PELÓN’
A simpática historia de “Nicomedes o pelado”, o novo libro infantil de Pinto&Chinto publicado por KALANDRAKA, vai ser o eixe da sesión de animación á lectura que se celebrará mañá venres, a partir das 18:30 horas, en LIBROS PARA SOÑAR. O protagonista deste relato surrealista queda sen pelo e vai procurando diversas alternativas para cubrir a súa cabeza, todas con moi pouco éxito ata que por fin dá cunha medida orixinal e sorpredente para remediar a súa prematura calvicie.
“Nicomedes o pelado” serve tamén para reflexionar sobre a imaxe física nunha sociedade que lle dá moita importancia ao aspecto exterior, cando o verdadeiramente importante é sentirse a gusto con un mesmo. O texto de Carlos López e as ilustracións de David Pintor destacan polo sentido do humor, a expresividade do personaxe e o colorido das páxinas desta obra destinada a lectores a partir de 5 anos.
Tamén de Pinto&Chinto, na sesión de contacontos de LIBROS PARA SOÑAR contaranse algúns dos micro-relatos do seu libro “Minimalario”, no que habitan excéntricos animais: un galo que desafina, un vagalume sen luz, una vaca que dá leite de cabra…
E fiando con Nicomedes e coa súa cabeza pelada, tamén se lembrará a obra do autor e ilustrador Fernando Krahn, “Quen viu as tesoiras?”, sobre unhas tesoiras moi falcatrueiras que saen voando dunha perruquería e comezan a cortar todo o que atopan ao seu paso, causando situacións insólitas e divertidas.
A sesión de contacontos rematará cun taller de plástica no que os nenos e nenas poderán axudar a Nicomedes a recuperar o seu cabelo, deseñando perrucas a base de papeis de cores, fíos de la, confeti, macarróns e outros materiais reciclables.
NO 13º CUMPRECONTOS DE LIBROS PARA SOÑAR
FESTEXAMOS O 13º ANIVERSARIO DE LIBROS PARA SOÑAR
Os autores Pilar Martínez e Chema Heras serán os invitados especiais de LIBROS PARA SOÑAR mañá venres, a partir das 18:30 horas, na festa que organiza a libraría infantil do Casco Vello vigués con motivo do seu 13º aniversario. Os nenos e nenas axudarán a soprar as velas da torta de cumpreanos e poderán tomar uns petiscos caseiros despois da sesión de contacontos: “A galiña roxa”, “Cando Martiño tivo ganas de mexar na Noite de Reis” (Kalandraka) e “O señor Don Nicanor” (Faktoría K) son algúns títulos do repertorio.
Pilar Martínez adaptou o conto tradicional “A galiña roxa”, no que se destaca a importancia do esforzo e da constancia para que o traballo -mellor en equipo- dea bos froitos. “Cando Martiño tivo ganas de mexar na Noite de Reis” é un divertido relato de Chema Heras no que o seu protagonista agarda con ansia os agasallos dos Magos de Oriente en recompensa ao seu bo comportamento. E sobre as vantaxes de afeccionarse aos libros e á lectura, Chema Heras e Pilar Martínez contarán tamén un relato rimado de Ana Fernández-Abascal, “O señor Don Nicanor”.
Os últimos 12 meses caracterizáronse polo dinamismo da libraría, con numerosas visitas de autores, ilustradores e presentacións de libros; sesións de contacontos amenizadas por músicos e narradores invitados; charlas formativas sobre animación á lectura e cursos de contacontos.
Así, por LIBROS PARA SOÑAR pasaron, durante o último ano, o artista plástico Pablo Otero, que impartiu un obradoiro de ilustración; o grupo Tanxarina Títeres, que estreou o álbum conmemorativo dos 25 anos do espectáculo “Titiricircus”; a escritora e actriz Paula Carballeira, contando historias sobre a paz e a guerra, tema do seu último libro, “O principio”; o autor José Antonio Abad, que presentou o libro-disco “As catro estacións” con música de Vivaldi; e a chilena María José Ferrada, que trala publicación de “O baile diminuto” gañou o V Premio Cidade de Orihuela co poemario “El idioma secreto”.
Os músicos David González e Xaime Rivas amenizaron varias sesións de contacontos a ritmo de acordeón e de zanfona. Tamén se celebraron, con moito éxito, as primeiras sesións de contacontos en lingua de signos, coa participación dos profesores Ana Acuña e Frank Eijo, e da intérprete Aránzazu Casas.
E non faltaron colaboradoras habituais de LIBROS PARA SOÑAR, como as narradoras Iria Mantilla e Bea Campos, que acompañaron nas sesións de contacontos para bebés, nas actividades infantís dos venres e nas xornadas de formación para profesorado, bibliotecarios, animadores e mediadores de lectura. A festa do 13º aniversario da libraría servirá para agradecer estas contribucións, o apoio dos lectores, e para enfocar os meses vindeiros con máis entusiasmo e novos proxectos.
LUÍS PREGO PRESENTA ‘XOGOS MUSICAIS’ NA SESIÓN DE BEBÉS
O músico Luís Prego será o invitado especial da sesión de contacontos para bebés que se realizará mañá mércores, a partir das 17:30 horas, en LIBROS PARA SOÑAR. Profesor de música e de baile tradicional, director de varias agrupacións folclóricas, investigador do folclore tradicional galego, Luis Prego tamén é autor do libro “Para cantar e bailar”. Nesta ocasión, presenta o seu novo traballo editorial, titulado “Xogos musicais”.
Trátase dun libro-cd ilustrado por Marta Iglesias e publicado por Cumio. Recompila cantos de berce, melodías para cantar cos nenos no colo, xogos de dedos, recitados e outras composicións coas que os cativos se familiarizan co ritmo, co movemento e cos primeiros bailes. Unha parte das pezas son de tradición oral, mentres que outras relacionadas co achegamento aos números e ás letras son creacións do propio Luís Prego.
“Xogos musicais” está dirixido aos pais e nais como ferramenta didáctica para que poidan practicar no fogar cun material sinxelo, a base de letras repetitivas e temáticas infantís.
Na presentación de mañá, Luís Prego vai estar acompañado por Álvaro Iglesias, músico e responsable dos arranxos musicais no CD deste novo libro, que ofrece 38 cancións. Ambos os dous interpretarán varios temas deste traballo musical, acompañándose co acordeón e coa guitarra acústica.
MARÍA JOSÉ FERRADA RECITARANOS ‘O BAILE DIMINUTO’
A escritora chilena María José Ferrada será a invitada especial de LIBROS PARA SOÑAR na sesión de contacontos de mañá venres, a partir das 18:30 horas. A autora presentará un dos seus últimos libros, “O baile diminuto”, publicado por KALANDRAKA, con ilustracións da súa compatriota Sole Poirot.
María José Ferrada recitará varios fragmentos desta obra destinada a nenos e nenas a partir de 6 anos. Os seus protagonistas son os insectos do campo: grilos, abellas, xoaniñas, vagalumes, bolboretas… Un texto poético e cheo de sonoridade, ideal para afondar no coñecemento do noso medio natural, da súa fauna minúscula máis descoñecida, e para estimular a creatividade dos lectores.
Precisamente, a sesión completarase cun obradoiro de collage, para que os cativos practiquen a técnica coa que Sole Poirot elaborou as ilustracións deste libro, logrando un resultado que sorprende pola súa orixinalidade.
María José Ferrada é licenciada en Comunicación Social pola Universidade Diego Portales de Chile. Estudou Lingüística aplicada á Tradución na Universidade de Santiago de Chile e realizou un máster en Estudos Asiáticos pola Universidade de Barcelona. Participou no Taller de Escritura da Fundación Pablo Neruda e publicou o seu primeiro libro en 2005. Tamén é autora de guións para curtametraxes, colabora con iniciativas literarias e teatrais, e publicou libros infantís. Actualmente traballa como xornalista e profesora do Instituto Chileno Xaponés de Cultura. Ademais de “O baile diminuto”, tamén é autora do libro de relatos “Un mundo raro”, publicado igualmente por KALANDRAKA. Vén de gañar o V Premio Internacional Cidade de Orihuela de Poesía para Nenos coa obra “El idioma secreto”, editado no selo FAKTORÍA K.
CONTOS E MÚSICA PARA BEBÉS
Contos tan coñecidos como “O coelliño branco”, “Once damas atrevidas” e os poemas máis sonoros e sinxelos do libro “Tras, tras, cucutrás” son algunhas das propostas da sesión de contos para bebés de 0 a 3 anos que se realizará mañá mércores, a partir das 17:30 horas, en LIBROS PARA SOÑAR. Será unha sesión especial a cargo da libreira Sandra Senra, que contará co acompañamento do músico David González, interpretando co acordeón melodías compostas expresamente para estes relatos infantís.
Ademais, na sesión habitual deste venres para nenos a partir de 4 anos, LIBROS PARA SOÑAR recibirá á escritora chilena María José Ferrada, que vén de gañar o V Premio Internacional Cidade de Orihuela de Poesía para Nenos coa obra “El idioma secreto”, publicada no selo FAKTORÍA K. María José Ferrada recitará varias composicións do seu anterior libro, “O baile diminuto”, editado por KALANDRAKA, adicado aos insectos do campo. A actividade complementarase cun obradoiro de collage.
Por outra parte, a sala de exposicións de LIBROS PARA SOÑAR lucirá neste mes de abril as ilustracións do libro “Niños”, realizadas pola artista plástica arxentina Natalia Colombo. “Niños” é o seu segundo traballo publicado na editorial KALANDRAKA, logo de “Cerca”, co que gañara en 2008 a primeira edición do Premio Internacional Compostela de Álbum Ilustrado.
Os protagonistas destas ilustracións son paxaros simpáticos e estrafalarios de formas orixinais e colores luminosos, que acentúan o carácter lúdico da obra.
2 DE ABRIL, DÍA DO LIBRO INFANTIL E XUVENIL
[Ilustración de Ana Sande para o libro "O patiño feo", Kalandraka]
2 de abril, DÍA INTERNACIONAL DO LIBRO INFANTIL E XUVENIL
Na data na que se conmemora en todo o mundo o nacemento de Hans Christian Andersen, creador de contos tan emblemáticos como “O patiño feo”, en LIBROS PARA SOÑAR festexamos o Día da Literatura Infantil e Xuvenil cun desconto do 10% nas compras de libros.
A OEPLI celebra esta xornada cun poema sobre a importancia da lectura.
Lemos xuntos, ti e eu.
Vemos que as letras forman palabras
e as palabras convértense en libros
que estreitamos nas nosas mans.
Oímos murmurios
e ríos buliciosos nas súas páxinas,
osos que cantan
graciosas melodías á lúa.
Entramos en misteriosos castelos
e das nosas mans soben ata as nubes
árbores florecidas. Vemos nenas valentes que voan
e nenos que atrapan as estrelas.
Lemos xuntos. Ti e eu, dando voltas e voltas,
percorrendo o mundo coa alegría nos libros.
[Poema de Pat Mora (tradución ao galego, Concha Blanco]
